Jul 27 2026 | २०८३, श्रावण ११गते
जिल्लाको वैतेश्वर गाउँपालिकाले चालु वर्षको किबि खेती बिस्तार तथा प्रवर्द्धन कार्यक्रम अन्तर्गत स्थानीय किसानलाई ९० प्रतिशत अनुदानमा किबिको बिरुवा वितरण गरेको छ ।
गाउँपालिकाले किबि खेतीयोग्य क्षेत्रको पहिचान गरी वडा नम्बर-६ बाहेकका सात वटा वडामा बुधबार बिरुवा वितरण गरेको वैतेश्वर गाउँपालिकाकी उपाध्यक्ष कल्पना उप्रेतीले जानकारी दिइन् ।
उपाध्यक्ष उप्रेतीका अनुसार पालिकाले वडा नम्बर-१ का ३६ जना किसानलाई १६ सय बिरुवा वितरण गरेको छ।त्यस्तै वडा नम्बर-२ का ६ जना किसानलाई दुई सय पाँचवटा, वडा नम्बर-३ का २४ जना किसानलाई तीन सय ७० वटा बिरुवा वितरण गरेको छ ।
त्यसै गरी वडा नम्बर-४ का २२ जना किसानलाई पाँच सय १३ वटा, वडा नम्बर-५ का ४ जना किसानलाई ९३ वटा बिरुवा वितरण गरेको हो ।
त्यस्तै वडा नम्बर-७ का १४ जना किसानको लागि दुई सय दुई वटा र वडा नम्बर-८ का ४३ जना किसानलाई नौ सय ६५ वटा बिरुवा वितरण गरेको छ ।
गाउँपालिकाले किसानलाई ९० प्रतिशत अनुदानमा हेवाड, मन्ट्टी, एलिसन जातको किबिको बिरुवा वडागत रूपमा वितरण गरेको वैतेश्वर गाउँपालिका कृषि प्राविधिक निरोज पाण्डेले जानकारी दिए। पालिकाले निवेदन र मागको आधारमा किसानलाई बिरुवा वितरण गरेको हो ।
सात वडामा उपाध्यक्ष उप्रेतीको रोहवरमा वडा अध्यक्षलाई बिरुवा वितरण गर्न प्रत्येकवडामा पुगेर बिरुवा हस्तान्तरण गरिएको प्राविधिक पाण्डेले बताए ।
पालिकाले यस वर्ष पालिकामै उत्पादन गरिएको विरुवालाई प्राथमिकता दिएर चार हजार ४४ वटा बिरुवा वितरण गरेको हो । एक जना किसानलाई न्युनतम ५ देखी अधिकतम ८० वटा सम्म बिरुवा अनुदानमा उपलब्ध गराइएको हो ।
सात वडाका एक सय पचास जना किसानलाई निवेदन र बिरुवा मागका आधारमा बिरुवा वितरण गरिएको छ ।
