Sep 17 2026 | २०८३, आश्विन १गते
काठमाडौं – प्रधानमन्त्री कप एकदिवसीय क्रिकेटमा नेपाल पुलिस क्लबले लुम्बिनी प्रदेशमाथि १०३ रनको फराकिलो जित निकालेको छ ।
मुलपानी क्रिकेट मैदानमा पहिला ब्याटिङ गरेको पुलिसले निर्धारित ३८ ओभरमा सबै विकेट गुमाएर २४५ रन बनाएको थियो ।
मौसमका कारण ३८ ओभरमा छोट्टाइएको खेलमा पुलिसका आरिफ सेखले ७६ रन बनाए । ओपनर कुसल भुर्तेलले ४८ रन बनाउँदा करन केसीले आक्रामक अर्धशतक पूरा गरे । उनले २७ बलमा ५ चौका र ५ छक्काको मद्दतमा ५७ रन बनाए ।
लुम्बिनीका नर सार्कीले ४ विकेट लिँदा बिर मगरले ३ र कृष्ण कार्की र अभिषेक गौतमले समान १-१ विकेट लिए ।
२४६ रनको लक्ष्य पछ्याएको लुम्बिनी ३६.३ ओभरमा १४२ रनमा अलआउट भयो । लुम्बिनीका दिलसाद अलिले ३६ र नर सार्कीले ३१ रन बनाउनु बाहेक अन्यले राम्रो प्रदर्शन गर्न सकेनन् ।
पुलिसका कुशल भुर्तेलले ३ र करन केसीले २ विकेट लिए । ललित राजवंशी, सागर ढकाल, रासिद खान र रोशन भुदालले समान १-१ विकेट लिए ।
यसअघि नै प्रधानमन्त्री कपको फाइनलमा प्रवेश गरेको पुलिसको यो प्रतियोगितामा लगातार आठौँ जित हो ।
