Sep 18 2026 | २०८३, आश्विन २गते
साउन १२, काठमाडौं - दुई नगरपालिका र आठ गाउँपालिका रहेको खोटाङमा ९५ प्रतिशत रोपाइँ सकिएको छ।
१२ हजार ८९८ हेक्टर क्षेत्रफलमा रोपाई हुँदै आएकामा अहिलेसम्म १२ हजार २९३ हेक्टरमा रोपाइँ सकिएको हो। यस वर्ष बेलादेखि पर्याप्त वर्षा भएका कारण तिव्र गतिमा रोपाई भएको कृषि ज्ञान केन्द्र खोटाङका कृषि प्रसार अधिकृत सञ्जयकुमार पण्डितले बताए।
लेकाली क्षेत्रमा पर्ने ऐसेलुखर्क गाउँपालिका, केपिलासगढी गाउँपालिका, रावाबेँसी गाउँपालिका, हलेसी तुवाचुङ नगरपालिका, दिक्तेल रुपाकोट मझुवागढी नगरपालिका लगायतका अलि उच्च भू-भागमा रोपाई सम्पन्न भइसकेको छ। जन्तेढुंगा गाउँपालिका, बराहपोखरी गाउँपालिका लगायतका पालिकाको बेँसी क्षेत्रमा मात्र हाल रोपाई भइरहेको कृषि प्रसार अधिकृत पण्डितले बताए।
कोभिड-१९ को महामारीका बिचमा पनि किसानलाई आ–आफ्नो खेतमा धान रोप्न भ्याइ-नभ्याइ छ। जिल्लामा कुल १४ हजार १५९ हेक्टर खेत भए पनि १२ हजार ८९८ हेक्टरमा धान लगाउने गरिएको छ।
सिमसार भएका खेतमा जेठको अन्तिम सातादेखि रोपाई हुने गरे पनि सिञ्चित र असिञ्चित प्रकारको खेतमा वर्षा भएपछि मात्र रोपाई हुने गरेको छ ।
सिञ्चित खेतमा जुनसुकै समयमा रोपाई गर्न सकिए पनि आकाशे पानीको भरमा रोपाई हुने असिञ्चित खेतमा वर्षा हुन थालेपछि किसान खेतमा पुग्ने गरेका छन् ।
जिल्लामा अटेमार्सी, मकवानपुरे, ताइचिन, रनजित लगायतका प्रजातीका धान रोप्ने गरिन्छ ।
