Sep 17 2026 | २०८३, आश्विन १गते
भोजपुर- भोजपुरमा सात वर्षीया बालिकाको बलात्कारपछि हत्या भएको छ । शनिबार बिहान आमचोक गाउँपालिका-६ टेङलुङछुकको जंगलको गुफामा सात वर्षीया नाबालिकाको शव फेला परेको जिल्ला प्रहरी कार्यालय भोजपुरका प्रहरी नायव उपरीक्षक सुदीपराज पाठकले बताए ।
बालिकालाई बलात्कारपछि हत्या गरेको आरोपमा प्रहरीले सोही स्थानका २१ वर्षीय दीपचन्द्र राईलाई पक्राउ गरेको छ । नाबालिका बिहीबार साँझदेखि हराइरहेकी थिइन् । परिवारले आफ्नी खेलिरहेको छोरी हराएको भन्दै फोनमार्फत प्रहरीलाई खबर गरेपछि शुक्रबार इलाका प्रहरी कार्यालय बयाङ र इलाका प्रहरी कार्यालय घोडेटारबाट २५ जनाको टोलीली खोज तलासी गरेको थियो।
अनुसन्धानमा अन्तिमपटक ती बालिका र उनको छिमेकी दीपचन्द्रको भेट भएको खुलेपछि उनीमाथि अनसन्धान गरिएको थियो ।
डीएसपी पाठक भन्छन्, ‘शरीरमा घाउहरू देख्यौं । त्यसपछि कसरी भयो भनेर सोध्दा घाँस काट्न जाँदा भएको भन्ने जवाफ आएपछि थप केरकार गरे पछि उनले घटना घटाएको स्वीकारे ।’
दीपचन्द्रले भनेको स्थानमै प्रहरीले ती बालिकाको शव भेटाएको छ । शरीरको तल्लो भागका कपडाहरू खुला अवस्थामा ती बालिको शव फेला परेको थियो । बालिकको शव पोस्टमार्टमका लागि धरान पठाइएको प्रहरीले जनाएको छ ।
