खोटाङ - खोटाङको जन्तेढुंगा गाउँपालिकालाई पुर्ण खोप सुनिश्चिता गाउँपालिका घोषणा गरिएको छ।

गाउँपालिकामा रहेका १६ महिनादेखी २३ महिना उमेर समुहका सबै बालबच्चाले सबै खालका खोपको मात्रा पाएको निश्चित भएपछि गाउँपालिकालाई मंगलबार पुर्ण खोप सुनिश्चितता गाउँपालिका घोषणा गरिएको हो।

पूर्ण खोप सुनिश्चित गर्ने कार्यविधि र निर्देशिका बमोजिमका सम्पूर्ण प्रकृया भएको आधारमा ६ वटा वडा रहेको सो पालिकालाई गाउँपालिका अध्यक्ष अरुणदेवी राईको अध्यक्षतामा पुर्ण खोप सुनिश्चितता पालिका घोषणा गरिएको स्वास्थ्य शाखाले जानकारी दिएको छ।

जन्मेदेखि दुई वर्षभित्र हरेक बालबालिकाले बिसिजी, दादुरा रुबेला, पोलियो, जापानिज इन्सेफइटिस लगायतका १२ रोग बिरुद्धको खोपको मात्रा पुर्णरुपमा पाएको आधारमा जन्तेढुंगालाई पुर्ण खोप सुनिश्चितता पालिका घोषणा गरिएको स्वास्थ्य शाखाका संयोजक सुर्य कार्कीले जानकारी दिए ।

गाउँपालिकामा जन्मेदेखी १५ महिनासम्मका १६५ जना, ५ जनाको पहिचान गरि छुट खोप लागाएको कार्कीको भनाई छ।

सामान्यतः जन्मेको १५ महिनामा दादुराको दोश्रो खोप लगाइसकेपछि बच्चाले पूर्ण खोप लगाएको पाएको मानिन्छ।

जिल्लाका साकेला गाउँपालिका, बराहापोखरी गाउँपालिका, खोटेहाङ गाउँपालिका, दिक्तेल रुपाकोट मझुवागढी नगरपालिका, रावाबेंशी गाउँपालिका, केपिलासगढी गाउँपालिका, हलेसी तुवाचुङ नगरपालिका, ऐसेलुखर्क गाउँपालिकालाई पूर्ण खोप सुनिश्चितता तथा दिगोपना घोषणा गरिसकिएको छ। दिप्रुङ चुइचुम्मा गाउँपालिकाले पूर्ण खोप सुनिश्चितता तथा दिगोपना घोषणा सभा गर्न बाँकी छ।

पुर्ण खोप सुनिश्चितता घोषणा कार्यक्रममा गाउँपालिका अध्यक्ष अरुणदेवी राई, जिल्ला समन्वय समितिका सदस्य मोहन सुप्तिहाङ, गाउँपालिका उपाध्यक्ष खेमबहादुर खड्का, प्रमुख प्रशासकीय अधिकृत उमेश गिरी, राजनैतिक दलका प्रतिनिधि, कर्मचारी र स्थानीयबासीको उपस्थिति रहेको थियो ।