Sep 18 2026 | २०८३, आश्विन २गते
खोटाङ-आगलागीमा घर जलेर नष्ट भएपछि खोटाङको जन्तेढुंगा गाउँपालिका-५ चिसापानी (पाथीभरा) का डम्बरबहादुर राईको परिवारको विचल्नी भएको छ।
किचनका रुपमा प्रयोग हुँदै आएको कटेरोबाट सुरु भएको आगोले घर र घरमा भएका सवैथोक जल्दा ८ जनाको परिवारको विचल्नी भएको हो।
शुक्रबार पास्नीको दिन अगेनामा खाना पकाउनेक्रममा कटेरोको टाँडमा राखिएको परालमा आगो सल्किएर आगलागी सुरु भएको चिसापानीका कार्यबाहक वडाध्यक्ष धनकुमार राईले बताए।
आगलागीमा सर्वस्व गुमाएका राई परिवार हाल रेडक्रसले उपलव्ध गराएको त्रिपाल टाँगेर बसिरहेका छन्। चिसोका कारण परिवारका वृद्धवृद्धा र वालबच्चा समस्यामा परेका छन्।
आगलागीबाट विस्थापितलाई वडा कार्यालयकातर्फबाट खाद्यान्न लगायतका बन्दोबस्तीका सामान उपलव्ध गराइएको कार्यबाहक वडाध्यक्ष राईले बताए।
विस्थापितको घर निर्माणका लागि छिमेकीले आर्थिक र भौतिक सहयोग जुटाउने अभियान सुरु गरिएको छ।
