Sep 17 2026 | २०८३, आश्विन १गते
खोटाङ - विद्यालयबाट घर फर्कने क्रममा १४ वर्षीया छात्रालाई आफ्नै साथीहरूले सामुहिक बलात्कार गरेको घटना सार्वजनिक भएको छ।
केपिलासगढी गाउँपालिकास्थित एक विद्यालयमा कक्षा–८ मा अध्ययनरत छात्रालाई सोही विद्यालयकै कक्षा–९ मा अध्ययनरत १५/१६ उमेर समुहका दुईजनाले साउन १९ गते राती सामुहिक बलात्कार गरेको प्रहरीले जनाएको छ ।
विद्यालयबाट घर फर्कने क्रममा 'तिमीसँग कुरा गर्नु छ' भन्दै दुई जनाले जङ्गलको बीचमा आएपछि बाटो छेकेर ओढारमा लगेर रातभरि बलात्कार गरेको पीडित छात्राको परिवारले जनाएको छ ।
विद्यालय गएकी बालिका घर नआएपछि आफन्तले खोज्ने क्रममा भोलिपल्ट घटनास्थलमै फेला पारेको जिल्ला प्रहरी कार्यालय खोटाङका सूचना अधिकारी सुशान्त मिश्रले बताएका छन् ।
आफन्तले साउन २१ गते जिल्ला प्रहरी कार्यालय खोटाङमा किटानी जाहेरी दर्ता गराएका छन् । आरोपित दुवै जना किशोर फरार रहेको प्रहरीले जनाएको छ ।
बालिकाको स्वास्थ्य परीक्षणपछि बिहीबार आफन्तको जिम्मा लगाएर पठाइएको छ ।
