Sep 18 2026 | २०८३, आश्विन २गते
बलात्कार अभियोग लागेका झापाको बिर्तामोड नगरपालिकाका पूर्वमेयर ध्रुवकुमार शिवाकोटी पुर्पक्षका लागि कारागार चलान भएका छन् ।
झापा जिल्ला अदालतका न्यायाधीश नविनकुमार जोशीको इजलासले सिवाकोटीलाई कारागार चलान गर्ने आदेश गरेको हो ।
शिवाकोटीको स्वास्थ्य अवस्था नाजुक रहेकाले अदालतले कारागारलाई उपचारको व्यवस्था मिलाउन आदेश दिएको छ ।
१७ वर्षीया घरेलु कामदार बालिकामाथि जबरजस्ती करणी गरेको आरोपमा शिवाकोटी मंसिर २४ मा पक्राउ परेका थिए ।
कलेज पोशाकमा काँकडभिट्टा नाकाबाट भारतको पानीट्यांकी जाँदै गरेकी बालिकालाई आफन्त नेपाल संस्थाका प्रतिनिधिहरूले भेटेर प्रहरीको सहयोगमा उद्धार गरेका थिए ।
आमा भारतमा बस्ने र बुबा नभएकी ती बालिकालाई शिवाकोटीले पढाइदिने भन्दै सानैदेखि घरेलु कामदारका रूपमा राखेका थिए ।
तत्कालीन अनारमनी गाविसको अध्यक्षसमेत रहेका शिवाकोटी एमालेबाट २०७४ मा बिर्तामोड नगरपालिकाको मेयरमा निर्वाचित भएका थिए ।
