खोटाङका श्रष्टा प्रकाश आचार्य ‘भावुक’ प्रभाको शोककाव्य ‘हजुरबा’ लोकार्पण गरिएको छ ।

दिक्तेल रुपाकोट मझुवागढी नगरपालिका-१ दिक्तेल फूलबारी टोलका आचार्यले आफ्नो स्वर्गीय हजुरबा बोलप्रसाद आचार्य ‘माझाघरे’को स्मृतिमा सिर्जना गरेको शोककाव्य महाशिवरात्रीको अवशर पारेर बिहिबार लोकार्पण गरिएको हो ।

जिल्ला समन्वय समितिको सभाहलमा आयोजित कार्यक्रममा साहित्यकार बिष्णु आभूषणले आचार्यको शोककाव्य ‘हजुरबा’ लोकार्पण गरेका हुन् ।

विभिन्न पत्रपत्रिकामा लेख रचना प्रकाशन गर्दै आएका आचार्यले साँस्कृतिक पुजारी रहेका स्वर्गीय हजुरबाको सम्मान र स्मृतिमा शोककाव्य तयार पारेका हुन् ।

लोकार्पण गरिएको पुस्तकमाथि शिक्षक काजीप्रसाद खतिवडाले टिप्पणी गरेका थिए । विभिन्न साहित्यीक एवं सामाजिक संघसंस्थामा आवद्ध आचार्य निजामती सेवामा आवद्ध छन् ।

राष्ट्रिय एकता दिवसको उपलक्ष्यमा २०७७ सालमा नेपाली सेनाले आयोजना गरेको राष्ट्रिय कविता प्रतियोगीतामा पुरस्कृत भएका आचार्य कथा, निवन्ध, कविता सिर्जनामा चम्किला श्रष्टा हुन् । उनी साहित्यीक पत्रपत्रिकासँग पनि आवद्ध छन् । बुवा अबिनारायण आचार्य र आमा कुमारी आचार्यको सन्तान रहेका प्रकाश सुनौलो बिहानी साहित्यीक पत्रिकाका सम्पादक र पुष्पसमय साहितयीक पत्रिकाका प्रधान सम्पादकको जिम्मेवारीमा पनि छन् ।

‘हजुरबा’ लोकार्पण कार्यक्रममा प्रमुख जिल्ला अधिकारी मित्रलाल शर्मा, साहित्यकार टंक भट्टराई, प्रेस स्वतन्त्रता सेनानी पत्रकार कृष्ण आचार्य, बुद्धिजिवी देबीप्रसाद रिजाल, शिक्षक काजीप्रसाद खतिवडा, श्रष्ठा, साहित्यनुरागी लगायतको उपस्थिति रहेको थियो ।