Nov 02 2026 | २०८३, कार्तिक १७गते
खोटाङ- खोटेहाङ गाउँपालिकाको वडा नम्बर–१ लिकुवापोखरी र वडा नम्बर–३ सावाकटहरेमा नेपाल कम्युनिष्ट पार्टी (नेकपा) परित्याग गरि एक सय बढी नेता कार्यकर्ता कांग्रेसमा प्रवेश गरेका छन् । लिकुवापोखरीमा ४५ र सावाकटहरेमा ५५ गरि एक सय जना कांग्रेसमा प्रवेश गरेका हुन् ।
नव प्रवेशीहरुलाई कांग्रेसका महासमिति सदस्य तथा यूवा नेता रविप्रकाश राईले माला र खादा लगाउँदै पार्टीको झण्डा हस्तान्तरण गरेर स्वागत गरेका छन् ।
कम्युनिस्टहरूले प्रधानमन्त्री र मन्त्री हुने तथा तलबभत्ता खाने तर, भ्रष्टाचारबाहेक अरु कुनै काम नगरेकोले कांग्रेसमा प्रवेश गर्नु परेको उनीहरुको भनाई छ । तत्कालिन नेकपा एमालेबाट प्रतिनिधि सभा जितेका विशाल भट्टराईले पनि गाउँ–ठाउँको विकासमा चासो नदिएको उनीहरुले बताएका छन् ।
उनीहरुले आगामी दिनमा सिङ्गो गाउँपालिकामा रहेका अन्य नेता कार्यकर्ता पनि कांग्रेसमा आउने ठोकुवा गरेका छन् । जनताको सुखदुखको पार्टी कांग्रेस भएको र जनतालाई कांग्रेसले धोका नसदिने भएका कारण सवै नेपाली कांग्रेस पार्टीमा गोलबन्द्ध हुनुपर्ने उनीहरुको धारणा छ ।
उक्त गाउँपालिका तत्कालिन नेकपा एमालेबाट प्रतिनिधि सभा जितेका भट्टराईको स्थाई घर भएको ठाँउ हो ।
