सोमवार, साउन ६, २०७६
Monday, Jul 22, 2019
Prabhav News

खोटाङ सिम्पानीको यस्तो ओढार, जसले आमा छोरालाई क्वाप्पै खायो (भिडियो सहित)



खोटाङ सिम्पानीको यस्तो ओढार, जसले आमा छोरालाई क्वाप्पै खायो (भिडियो सहित)

ताराचन्द्र बस्नेत ।
वल्ल तल्ल लगाएको मकै वाली, दिउँसो भएपछि बाँदरबाट राति भएपछि दुम्सीको मुखबाट जोगाएर खानुपर्ने बाध्यता । त्यहि बाध्यतालाई चिर्न खोटाङको खोटेहाङ गाउँपालिका–८ सिम्पानीकी ४५ वर्षीय सरिता तामाङ आफ्ना नावालक छोरा छोरी लिएर दुम्सीलाई धुवाँ लगाउँन गत साउन २६ गते बिहानै डिहीखोलाको ठुलो ओढारमा पुग्छिन् ।

११ वर्षीय छोरा नवल र ८ वर्षीय छोरी पुजनालाई लिएर ओढारमा पुगेकी सरिताको निशाना थियो डिहीखोलाको ओठारमा बस्ने दुम्सीलाई तह लगाउँने र आफ्नो पाक्न लागेको मकै वाली सुरक्षित गर्नै । तर उनको निशाना ठीक बिपरित भईदियो ।

भनाई छ दशा बाजा बजाएर आउँदैन, अनि अर्को पनि भनाई छ, दुम्सीले दुख दिए वरीपरि आगो वाले भाग्छ भन्ने । तर त्यो दिन सरिताको दशा भएको दिन रहेछ । जव सरिताले ओडारको मुखमा आगो वाल्छिन् । त्यो ह्वात्तै ठुलो बलेपछि बाहिर निस्कन सकस बन्नासाथ धुँवामा निसास्सीएर सरिताको ज्यान गएको प्रहरीले अनुमान गर्छ ।

बिहानै घरबाट निस्कीएका उनिहरु दिन बित्न लाग्दासम्म घर नफर्कीएपछि गाँउमा हल्लाखल्ला हुन्छ । उनीहरुको कतै अत्तोपत्तो नभएपछि आफन्त र स्थानीयवासी खोजीकार्यका लागि स्थानीय प्रहरी चौकी सिम्पानी पुग्छन् । त्यसपछी प्रहरी र स्थानीय खोजीको लागि डिहीखोलाको ठूलो ओडारतिर लाग्छन् । ओडार बाहिर मोबाईल,जुत्ता ,चप्पललगायतका सामान भेटिन्छ ।

यत्तिकैमा पुजनाको चिच्याएको आवाज सुनिन्छ । पुजनालाई बोलाउनासाथ उनि आफै बाहिर आउँछिन । र उनि हतास मुद्रामा भन्छिन्,, ममि र दाई भित्र …………. ।

स्थानीय हतार हतार ओडार भीत्र जान्छन् । ओडारभीत्र सरिताको निधन भईसकेको र नवल अर्धचेत अवस्थामा रहेको भेट्छन् ।

स्थानीय रामकुमार पुरीका भन्छ्न, सरिताको शव र नवललाई ओडार बाहिर ल्याएपछि हामी सवै भावविहल भयौ । त्यसपछि सवैलाई खवर ग-यौ र नवललाई उपचारमा लैजानका लागि वातावरण मिलाउँन लाग्यौं ।”

त्यसपछि तत्काल सिम्पानी वडा प्रमुखसहित विभिन्न व्यक्ति तथा निकायको पहलमा २ लाख भन्दा बढी रकममा हेलीकोप्टर चार्टर गरेर उपचारका लागि काठमाण्डौंको शिक्षण अस्पताल लगिन्छ ।

छोरी पुजना समान्य घाईते भएकोले उनलाई घरतर्फ लगिन्छ । उता पैसा कमाउन कतार पुगेका सरिताका जेठा छोरा बिजयलाई यस्तो खबर सुन्दा सपना झैँ लाग्छ । उनी कम्पनीको काम छोडेर नेपाल फर्कन्छन् ।

तर, कान्छा छोरा नवलको एक हप्ताभन्दा बढी समयमा लाखौँ रुपैँया सकिएर आर्थिक संकट खड्किएपछि घर ल्याईन्छ । र अर्धचेतमै नावालक नवलले भदौ २८ गते यो संसारबाट विदा लिन्छन् ।

स्थानीय सुरेश पुरीका अनुसार पुजनाकोे अवस्था भने हाल सामान्य रहेको छ । नावालक छोरा र पत्नि एउटै ओढारले खाएपछि मृतक सरिताका श्रीमान कुशबहादुर तामाङ, विजय र पुजनासंगै सिङ्गो गाउँ यतिवेला शोकमा डुवेको छ ।

सरितका श्रीमान कुशबहादुर स्थानीय प्रजातन्त्र प्रा.वि. डिहिगाँउका प्रध्यानाध्याक हुन् । सिम्पानी मा.वि. सिम्पानीका कक्षा ६ मा अध्ययनरत छात्र नबलको निधनले पूरै विद्यालय शोकमा परेको विद्यालय स्रोत बताउँछ । बाल्यकालमा आमा र दाई गुमाएकी पुजना बाँच्न सफल रहेकोले निकै भाग्यमानी रहेको स्थानीय ८० वर्षीय बृद्धा ईन्द्रकुमारी पुरी बताउँछिन । उनि भन्छिन्, “सोच्दै नसोचेको घटना घट्यो, त्यो अपराधि ओढारले सरिता र नवललाई क्वाप्पै निल्यो ।”

आर्थिक स्तर कमजोर रहेको मृतक सरिताको परिवारलाई कुनै पनि निकायले हालसम्म सहयोगको चेष्टा गरेका छैनन् । नत गाउँपालिका नत वडा कार्यालय कसैले पनि सावन्तना सम्म नदिएको सरिताका श्रीमान कुशबहादुर बताउँछन् ।

भिडियो हेर्नका लागि यहाँ क्लीक गर्नुहोस :

प्रकाशित मिति : शनिबार, भदौ ३०, २०७५

प्रतिकृया दिनुहोस


भर्खरै


© copyright 2019 and all right reserved to Prabhav News | Site By : SobizTrend Technology