खोटाङमा यातायात बन्द गर्दै हिड्ने अध्यक्ष सहित चार पदाधिकारी पक्राउ

खोटाङ, बैसाख २१ : यातायात सेवा ठप्प पारेको भन्दै प्रहरीले खोटाङ यातायात व्यवसायी संघका अध्यक्ष सहित चार पदाधिकारीलाई पक्राउ गरेको छ ।

सिण्डकेट खारेज गर्ने सरकारको निर्णय बिरुद्ध जिल्लामा यातायात सेवा ठप्प पारेको भन्दै प्रहरीले स्थानीय प्रशासनको निर्देशनमा यातायात व्यवसायी संघका अध्यक्ष बिष्णुकुमार श्रेष्ठ, बरिष्ठ उपाध्यक्ष राजकुमार राई, महासचिव रामकुमार हिङमाङ र सल्लाहकार बुद्धिबिनोद लुइटेललाई शुक्रबार पक्राउ गरेको हो ।

पक्राउ गरिएका यातायात व्यवसायी संघका पदाधिकारीलाई जिल्ला प्रहरी कार्यालयको नियन्त्रणमा राखिएको प्रमुख जिल्ला अधिकारी सुरेन्द्रराज पौडेलले बताए ।

यातायात व्यवसायीलाई नियन्त्रणमा लिए पनि जिल्लामा यातायातका सवारी साधन चलेका छैनन् । सवारी साधन नचल्दा बिरामी तथा आकस्मिक कामका लागि यात्रा गर्ने स्थानीय मारमा परेका छन् ।